Caniatâd

Cartref > Caniatâd

Gwneud cais am ganiatâd

Fe wnaeth Menter Môn gais i Lywodraeth Cymru o dan y Ddeddf Trafnidiaeth a Gwaith am ganiatâd i ddatblygu a gweithredu parth Morlais. Gwnaeth Menter Môn gais hefyd i Dîm Trwyddedu Morol Cyfoeth Naturiol Cymru am drwydded forol o dan Ddeddf y Môr a Mynediad i’r Arfordir 2009. Roedd y ddwy broses yn rhedeg ar yr un pryd – a daeth caniatâd ym mis Rhagfyr 2021.

Asesiad Effaith Amgylcheddol

Roedd Asesiad Effaith Amgylcheddol yn cael ei baratoi fel rhan o’r broses a chyda mewnbwn gan ymgynghorai statudol. Cytunwyd y sgop gyda Cyfoeth Naturiol Cymru a Llywodraeth Cymru. Cafodd arbenigwyr annibynnol eu comisiynu i gynnal astudiaethau manwl er mwyn deall effeithiau posib y prosiect ar yr amgylchedd – o’r gwaith adeiladu i’r gwaith digomisiynu. Roedd yr astudiaethau’n edrych ar:

  • Waddod morol a safon y dwr.
  • Treftadaeth naturiol, ecoleg gwaelod y môr, mamaliaid y môr, pysgod a physgod cregyn, adareg, ecoleg daearol ac arfordirol.
  • Morlun a thirlun.
  • Llongau a mordwyaeth.
  • Archaeoleg a threftadaeth ddiwylliannol.
  • Twristiaeth a gweithgareddau hamdden.

Roedd ymgynghori’n rhan bwysig o’r astudiaethau – gydag ymgynghori statudol ar faterion technegol allweddol yn ogystal ag ymgynghori gyda’r gymuned ac eraill sydd â diddordeb yn y prosiect.

Cafodd y datganiad amgylcheddol ei gyflwyno gyda’r cais am ganiatâd. Mae’r datganiad hwn yn cynnwys gwybodaeth am yr effeithiau amgylcheddol posib a pha fesurau fyddwn yn eu cymryd i sicrhau bod yr effaith yn cael ei leihau neu ei osgoi yn gyfan gwbl.

 
Cam 1 – Cais am ganiatâd

Roedd y cam yma yn ceisio sicrhau caniatâd i ddatblygu prosiect Morlais.

Cam 2 – Rhoi’r prosiect ar waith

Daeth penderfyniad ar gais Morlais am ganiatâd fis Rhagfyr 2021. Yn dilyn hyn, byddwn yn canolbwyntio ar yr hyn sydd ei angen er mwyn rhoi’r datblygiad ar waith.

Bydd y gwaith adeiladu’n digwydd fesul dipyn. Bydd y gwaith ar y lan ddigwydd yn ystod 2022, gyda’r gwaith allan yn y môr yn cychwyn yn ystod 2023. Yna bydd datblygwyr technoleg llif llanw yn gallu gosod eu dyfeisiadau yn y môr er mwyn cynhyrchu trydan.

HYSBYSIAD CYHOEDDUS

DEDDF Y MÔR A MYNEDIAD I'R ARFORDIR 2009

RHEOLIADAU GWAITH MOROL (ASESU EFFEITHIAU AMGYLCHEDDOL) 2007

Cais am amrywiad i drwydded forol ORML1938, Parth Arddangos Morlais

Hysbysir drwy hyn fod Menter Môn Morlais Limited wedi rhoi mwy o wybodaeth i Cyfoeth Naturiol Cymru mewn perthynas â'r cais uchod yn unol â Rheoliad 14 Rheoliadau Gwaith Morol (Asesu Effeithiau Amgylcheddol) 2007 (‘y Rheoliadau Asesu Effeithiau Amgylcheddol’). Cyhoeddwyd hysbysiad o'r cais a'r datganiad amgylcheddol ar 22 Hydref 2025 a 29 Hydref 2025.

Mae Menter Môn Morlais Limited wedi cyflwyno cais i Cyfoeth Naturiol Cymru am drwydded forol dan Ran 4 Deddf y Môr a Mynediad i'r Arfordir 2009 i amrywio drwydded forol ORML1938 Parth Arddangos Morlais er mwyn gosod dyfeisiau ar wely’r môr sy’n dod i’r wyneb. Mae angen caniatâd asesu effeithiau amgylcheddol ar y prosiect ac mae'n destun y gofyniad am asesiad o’r effaith amgylcheddol dan y Rheoliadau Asesu Effeithiau Amgylcheddol. Mae datganiad amgylcheddol wedi cael ei baratoi gan yr ymgeisydd.

Mae copïau o'r wybodaeth ychwanegol ar gael i'r cyhoedd eu harchwilio am ddim yn ystod oriau swyddfa arferol yn Neuadd Y Dref Llangefni, Sgwar Bulkeley, Llangefni, LL77 7LR am gyfnod o 35 ddiwrnodau o ddyddiad yr hysbysiad hwn.

Gallwch hefyd gael copïau o'r wybodaeth ychwanegol ar-lein o https://publicregister.naturalresources.wales/ neu drwy e-bostio permittingconsultations@cyfoethnaturiolcymru.gov.uk.

Os gofynnir am gopïau caled o'r dogfennau uchod, efallai bydd yn rhaid talu costau nad ydynt yn fwy na chostau copïo rhesymol. 

Dylai unrhyw un sydd am gyflwyno sylwadau ynghylch yr wybodaeth ychwanegol wneud hynny'n ysgrifenedig i Cyfoeth Naturiol Cymru yn y Gwasanaeth Trwyddedu, Cyfoeth Naturiol Cymru, Swyddfeydd Llywodraeth Cymru, Parc Cathays, Rhodfa’r Brenin Edward VII, Caerdydd, CF10 3NQ, neu drwy e-bostio marinelicensing@cyfoethnaturiolcymru.gov.uk o fewn 35 ddiwrnodau o'r hysbysiad hwn. Mae’n rhaid cyflwyno'r sylwadau'n ysgrifenedig, wedi'u dyddio, gan nodi'r enw'n glir (mewn priflythrennau) ynghyd â chyfeiriad e-bost neu gyfeiriad post llawn y sawl sy'n cyflwyno'r sylwadau.

Dyfynnwch y cyfeirnod ORML1938v1 ym mhob darn o ohebiaeth.

Eir i'r afael â sylwadau gan aelodau'r cyhoedd yn unol ag Atodlen 5 y Rheoliadau Asesu Effeithiau Amgylcheddol. Caiff copïau o sylwadau ysgrifenedig a dderbynnir gan Cyfoeth Naturiol Cymru eu hanfon at yr ymgeisydd ac efallai y byddant ar gael yn gyhoeddus hefyd. 

Mae Cyfoeth Naturiol Cymru'n awdurdod priodol dan y Rheoliadau Asesu Effeithiau Amgylcheddol ac mae wedi derbyn swyddogaethau dirprwyedig fel yr awdurdod trwyddedu priodol gan Weinidogion Cymru at ddibenion Rhan 4 Deddf y Môr a Mynediad i'r Arfordir 2009. Wrth benderfynu ar y cais, efallai y bydd Cyfoeth Naturiol Cymru'n rhoi caniatâd asesu effeithiau amgylcheddol ar gyfer y prosiect, rhoi caniatâd asesu effeithiau amgylcheddol ar gyfer y prosiect ynghyd ag amodau, neu wrthod caniatâd asesu effeithiau amgylcheddol ar gyfer y prosiect.