Blog Jack

Hyfforddiant Person Awdurdodedig Foltedd Uchel

Ychydig o wythnosau yn ôl, mynychais y cwrs Gweithrediad Cyfyngedig Systemau Pŵer Foltedd Uchel (HV) a ddarparwyd gan PASS Ltd yn Stockton-on-Tees. Rhoddodd y cwrs hwn gyflwyniad gwerthfawr i rolau a chyfrifoldebau Personau Awdurdodedig sy'n ymwneud â gweithredu a chynnal a chadw systemau trydanol foltedd uchel yn ddiogel.

Dros y tri diwrnod, datblygais ddealltwriaeth gref o'r gwahanol fathau o offer switsio HV, yn ogystal â'r nodweddion generig, y ddogfennaeth a'r gweithdrefnau sy'n sail i Reolau Diogelwch HV. Ffocws allweddol oedd pwysigrwydd dilyn gweithdrefnau gweithredu diogel cyn i unrhyw waith ddechrau, gan sicrhau bod systemau wedi'u hynysu, eu gwirio a'u dogfennu'n gywir i amddiffyn personél ac offer.

Elfen o'r hyfforddiant oedd yn arbennig a werthfawr oedd y cyfle i ymarfer ar rig pwrpasol y ganolfan, sy'n gweithredu ar 110V sydd yn ei hanfod yn ddiogel. Yn ystod yr ymarfer hwn, cefais brofiad ymarferol o baratoi amserlen switsio, ynysu offer switsio yn ddiogel, rhoi trwydded i weithio, ac yn y pen draw adfer y system i wasanaeth. Atgyfnerthodd y cymhwysiad ymarferol hwn y wybodaeth ddamcaniaethol ac amlygodd y manwl gywirdeb, y cynllunio a'r atebolrwydd sydd eu hangen wrth weithio gyda systemau HV.

Mae'r cwrs hwn yn gam pwysig tuag at fy enwebiad fel Person Cymwys o dan ein Rheolau Diogelwch Foltedd Uchel ym Morlais. Bydd cyflawni'r enwebiad hwn yn fy ngalluogi i ddal dogfennaeth diogelwch a goruchwylio personél sy'n gweithio ar, neu gerllaw, offer Foltedd Uchel Morlais. Mae'r hyfforddiant hwn wedi fy helpu i ddatblygu sgiliau technegol a diogelwch amhrisiadwy, gan gynnwys ymwybyddiaeth o risg, cydymffurfio â gweithdrefnau, a chymhwysedd gweithredol HV ymarferol.

Mae'r sgiliau hyn yn hanfodol ar gyfer sicrhau gweithrediad diogel a dibynadwy o'r system drydanol a byddant yn chwarae rhan allweddol wrth gefnogi fy natblygiad proffesiynol parhaus. Mae'r profiad wedi cryfhau fy hyder wrth weithio gyda systemau foltedd uchel ac mae'n nodi carreg filltir yn fy natblygiad fel peiriannydd.